Rev 18 | TPZ | STEP | A tah vëh to hik en, köß ep in a meh ankeroß to taneß maß pa vöön va kin ko kunah maß. Eß to teß me non o maaka me o kikis apuh, ko maaka peß ëman ke non po oeh avoes.

Revelation of John 18

A Babiron Se Hat En

1 A tah vëh to hik en, köß ep in a meh ankeroß to taneß maß pa vöön va kin ko kunah maß. Eß to teß me non o maaka me o kikis apuh, ko maaka peß ëman ke non po oeh avoes. 2 Eß to kokoeß suntan rakah, pareß soe pan,

“A vöön apuh vëh Babiron to hat en, eß to hat en!
Eß to tavus en a ö teßteß pa ma tuvuh hat,
eß to tavus en a ö teßteß pa ma tuvuh, hat me a ma növan hat to teß ne nën,
me a ma növan hat oah rakah to teß ne nën,
3 Suk ataeah, a napan poë varih to vasunön voh ne a ma sosoenën vapikpiuk.
Eß to teß va non manih pee to nok a taateß rëhrëh me e köövo pamëh,
ka taateß pamëh to teß va non manih pee to kaak o ruiß eh.
Ka ma teß susunön varih po oeh, ee me to vasunön voh ne a ma sosoenën vapikpiuk.
Ka taateß pamëh to teß va non manih pee to nok a taateß rëhrëh me e köövo pamëh.
Me a ma napan varih po oeh to vavavoen kakoß voh ne,
pare nonok moniß vapeo voh ne.
Suk e köövo pamëh to voen taneß manih pee a ma moeh tah peo neß to iu non,
ivëhpëhkëk, eß to öt vapeo oah e non pa ma tah neß se öt non.”
4 Eöß to tënan a meh teß manuh pa vöön va kin to soe maß pan,

“Ma napan peöß, eöm se këh tavus maß a vöön manem!
Eöm se koe a vamomhë me a teß manem, me a ma taateß hat peß,
tomeß a ma punis peß kopös a neöm.
5 A ma taateß hat peß to parin a peo vörep, ko teß öök e ne na manuh kin,
ke Sosoenën nat tamoaan e non pa ma hat peß.
6 Eöm se nat e nem pa ma taateß hat ne köövo rëhrëh pamëh
to nok manih pa ma meh teß, ko piun hah keah a ma taateß hat poë varih.
Eß to ununun voh a ma taateß hat peß, kee tavus vapeo.
Ivëh, köm se piun oah pet keah a ma taateß hat neß to nok voh, to onöt non a ma taateß hat peß neß to nok manih po upöm teß.
Eß to hovën vaßpuh voh o ruiß eh manih pa kap, ko heß a ma napan pe Sosoenën.
Ivëh, ke eöm se hovën vaßpuh oah pet o ruiß eh manih pa kap, ko heß varuß eah keß kaak.
7 Eß to kë koman hah voh non a ëhnaneah, ko ununun voh non a ma tah peo vihvih.
Ivëh, köm se heß punis eah, keß kon kamis to onöt va non manih pa ma tah poë varih neß to nonok voh non, keß se ook vörep.
Eß koman to sosoe va non manih pan, ‘Eöß e köövo sunön to ihoß noß pa matop a ma napan,
ko hikta teß noß a köövo amop ne voe to mët këh voh. Eöß hikta se okook noß ko hikta se taum noß ta punis.’
8 Ivëh, ka ma vu hat rakah se tavus manih peß po pöh poen ro.
O maë apuh se tavus, me a nap peo se mët, me a napan se vaokook ne.
A suraß se ës vahik a Babiron.
E Sunön, e Sosoenën to teß me non o kikis se kiiki poan, ko piun ke poan a ma vu punis apuh oah rakah.”
9 A ma teß sunön varih po oeh to iu tavus voh ne o teß öt ö vörep. Suk a köövo pamëh to voen taneß manih pee, a ma moeh tah peo neß to iu non, ivëhpëhkëk, eß to öt vapeo oah e non pa ma tah neß se öt non. Ee se vaokook ne pa ö see ep in o öh va pa suraß to ësës non a vöön. 10 Ee se sun varo e ne maß to nanaöp e ne pa huk vatët tomeß a punis nö maß pee, pare soe maß pan,

“Vaururuan! Vaururuan rakah vöön apuh Babiron!
Eën a vöön apuh parën eh rakah me!
Pa pah aoaß ro nën to kon eöm pa piun in a ma taateß hat nën to nok voh!”
11 A ma nap vavavoen kakoß varih po oeh, ee se kokoman e ne pa vöön pamëh, ko vaokook e ne, suk ataeah, a hikta teß se voen taneß hah ta kakoß manih pa ma iuun kakoß pee. 12 A ma kakoß poë varih, eß a gol, ka silvaß, vös voen vapeah, mök voen vapeah, me a rara kakaare, me a ma vu rara ereraß, me o rara silkaß. Me a naon ovoavuh vih, me a ma tah to nok ne pa ma riu elepen, me a ma tah nee to nok po naon voen vapeah, me po bras, me po aën, me po vös nee to popokaß ne a mapol. 13 Ka ma kakoß nee to vavoen voh ne ivarih, sinamon, tößtöß ënëën, a ma tah ësës ovoavuh vih, a tah uhuh ovoavuh vih, me o voaën, me o vamom nee to nok po naon öliv, me o praoaß vih, me o vuit, me o purmakaöß, me o sipsip, me o hös, me o karis, me a ma teß kikiu akuk, me a ma teß nee to öt pa tëëm vavapus. A ma tah kurus varih no a hikta teß se vavavoen hah non. 14 Ka nap vavavoen kakoß se soe vamanih pan,

“Babiron, a ma tah vih varih no a komömah to iu non to ro këh ee pën,
me a ma ohop vavatëk vavih pën to ro këh ee pën.
A ma napan hikta se ep hah ka nom oah to öt nom a ma tah poë varih!”
15 Ka nap vavavoen kakoß voh manih pa vöön pamëh, ee se nanaöp rakah e ne po kamis hat vëh no a vöön apuh to kon. Ee se sun varo këh e ne maß pa vöön me o kokoman karë, ko vaokook ne. 16 Ee se soe vamanih pan,

“Varenan! Varenan rakah pa vöön apuh vëh!
Moaan voh, eß to ohop voh non a ma ohop kakaare vihvih,
me a ma vu ohop ereraß,
ko ohop me voh non a ma ohop nee to nok voh pa gol,
me a ma mök ep vavih voen vapeah nee to mök voh ne!
17 Pa pah aoaß ro rakah no a ma moniß apuh,
me vatëk ep vavih poë varih to hik kurus ee.”
Ka ma teß vavanö paröß, me a ma teß varih to kiu ne komön o paröß, me a ma teß varih to kokon moniß ne pa voen a ma tah va tahiß, a napan poë varih to sun varo këh e ne maß pa vöön va Babiron. 18 Ee to sun varo ne maß pare ep ne maß o öh va pa vöön vëh to ësës non, pare vaokook varenan vamanih pan, “A vöön poanheh to teß va non manih pa vöön apuh vëh?” 19 Ee kurus to vi peah o vavoan manih pa pasuire, ko vaokook ne pare sosoe ne pan,

“Varenan! Varenan rakah pa vöön apuh vëh!
A ma tövaneah pa ma paröß varih to nönö voh ne tahiß,
ee to tavus voh o teß öt ö pa ma moniß va pa vöön apuh vëh,
a pah aoaß ro rakah no a ma tah kurus poë varih to hik ee!
20 Eöm varem pa vöön va kin me a ma napan pe Sosoenën,
me a ma teß vanënën soe, me o aposol, eöm se vaeö rakah nem pa tah vëh to tavus manih pa vöön vëh.
E Sosoenën to kiiki voh en pa ma taateß peß, ko piun ke poan a punis no a vöön vëh to nok voh manih peöm.”
21 A tah vëh to hik en, ke eöß ep in a ankeroß eh to kon a vös apuh kokon vuit, ko vi kunah en peß manuh tahiß. Pareß soe pan,

“A ö vëh nee se vi kunah va in a vöön apuh va Babiron,
ka napan hikta se ep hah ne poë.
22 Ivëh, ka tanih va pa gitaß, me a kuru, me a suvin, me a ma moeh vu tah tatanih,
ee hikta se tënan hah ne a ma vu tanih poë varih manih pën.
Ka ma napan varih to vavaasis vahik voh maß pa ma vu kiu,
ee hikta se ep hah ne a ma napan poë varih to teß hah ne manih pën.
A tanih va pa ma tah nonok taëën,
no a napan hikta se tënan hah ne manih pën.
23 O ëman va po ram, nee se hikta se ep hah ne manih pën.
Ka rivoeero teß tövaen, me a köövo tövaen to iu vaen ne,
ee hikta se tënan hah ne raoe manih pën.
Moaan voh a ma napan voh pën varih to matop voh ne a ma kiu moniß, ko teß ne a nap sunön öt ö pa matëëra ma napan.
Ke eën Babiron, eën to nonok voh nom a ma ëtoß ororaß teß manih pa ma upöm napan va po oeh.”
24 E Sosoenën to heß punis a vöön va Babiron, suk o eraß po teß vanënën soe, me a ma napan pe Sosoenën to takoß voh koman pa vöön pamëh.